Google-gleraugun á markað í lok ársins

Alvöru fólk með gríðarlegan áhuga á nýjustu tækni og opinn hug fékk tækifæri til að gerast tilraunadýr Google í síðasta mánuði þegar fáeinir einstaklingar voru valdir til að prófa Google-gleraugun.

Gleraugun voru kynnt á ráðstefnu Google í júlí í fyrra. Þau eru í raun ekki gleraugu því í stað tveggja glerja fyrir hvort auga hefur þunn álplata verið fest á spöngina. Í álplötunni er lítil tölva, myndavél, skjár og GPS-staðsetningarbúnaður.

Gleraugun eiga að umbylta venjulegri notkun okkar á tækni. Í stað þess að tækniunnendur taki upp snjallsíma til að taka mynd, eða hvað eina, er markmið Google að gleraugun verði helsta tæki mannkynsins.

Google er jafnframt ekki feimið við að sýna nýju græjuna því venjulega fólkið sem var svo heppið að fá að prófa gleraugun má nota þau eins og það vill. Google sendir svo mánaðarlega uppfærslur með nýjustu viðbótum og lagfæringum.

Gert er ráð fyrir að gleraugun komi á almennan markað á síðasta ársfjórðungi þessa árs. Það er því ekki langt þar til tækninördar, sem engan áhuga hafa á útliti sínu, geta keypt sér tölvugleraugu.