Grínistar í skiptinámi

„Það er rosalega kalt í þessum löndum en greinilega hlýtt á milli þeirra sem þar búa,“ segir grínistinn Ari Eldjárn. Hann kemur fram á tveimur sýningum í apríl ásamt kanadíska uppistandaranum Craig Campbell og Norðmanninum Jonas Kinge Bergland.

Ari segir uppistandara frá ólíkum löndum halda sambandi sín á milli og líkir því við hálfgert skiptinám. „Þetta er eins og Nordjobb nema hér fara menn á milli landa til að vinna í uppistandi,“ segir hann.

Uppistandararnir sem koma fram með Ara eru báðir vel þekktir í heimalöndum sínum og víðar. Campbell hefur fest sig í sessi sem einn vinsælasti grínisti Bretlands og ásamt því að koma fram einn hefur hann líka verið reglulegur gestur í sjónvarpsþáttunum Michael McIntyre‘s Comedy Roadshow sem og hitað upp fyrir Frankie Boyle. Bergland er einn vinsælasti grínisti Noregs og vann meðal annars til verðlauna fyrir bestu uppistandssýninguna í Noregi í fyrra. Hann er læknir að mennt og sinnir gríninu samhliða læknisstarfinu. „Jonas er svo góður að hann hefur varla tíma til þess að vinna sem læknir því hann er svo eftirsóttur uppistandari,” segir Ari um kollega sinn.

Sýningin, sem ber yfirskriftina Uppistand – Kanada Ísland Noregur, fer fram í Þjóðleikhúskjallaranum þann 5. apríl og í Menningarhúsinu Hofi á Akureyri kvöldið eftir. Miða á sýningarnar er hægt að kaupa á Midi.is.

sara@frettabladid.is