Sumir leikstjórarnir fastir í fermingarveislum

„Elsta myndin sem við sýnum er frá 1962 svo þetta spannar ansi langt tímabil,“ segir Þ. Tjörvi Þórsson, verkefnastjóri hjá Kvikmyndamiðstöð Íslands. Í tilefni af hækkun framlaga í Kvikmyndasjóð Íslands ætlar Kvikmyndamiðstöðin og íslenskt kvikmyndagerðarfólk að bjóða landsmönnum í bíó nú um helgina en á fjórða tug íslenskra kvikmynda verða sýndar víðs vegar um landið.

Leikstjórar og aðstandendur sýninganna hafa margir hverjir boðað komu sína út á land og munu svara spurningum að sýningum loknum. Þar á meðal má nefna þá Óskar Jónasson, sem verður á Ólafsfirði á laugardag ásamt mynd sinni um Hetjur Valhallar, og Rúnar Rúnarsson, leikstjóri Eldfjalls, sem fer austur á Raufarhöfn á sunnudag.

Tjörvi segir það hafa verið dálítið maus að púsla þessu saman en að spennan sé mikil, enda bíósýningar fátíðar á landsbyggðinni. „Leikstjórarnir voru líka allir mjög áhugasamir þó svo sumir þeirra séu erlendis og aðrir fastir í fermingarveislum.“ Hann segir að þær myndir sem sýndar verða í Háskólabíói verði í enn betri gæðum en áður hefur sést. „Þessar myndir eru í alveg nýjum útgáfum. Það er búið að hreinsa þær og litgreina upp á nýtt og eru nú bara eins og Hollywood-myndirnar,“ segir Tjörvi, en þær myndir sem um ræðir eru „Skytturnar“, „79 af stöðinni“, „Húsið“, „Hrafninn flýgur“, „Rokk í Reykjavík“ og „Englar alheimsins“.

Nánari upplýsingar má finna á www.kvikmyndamidstod.is.

-ka