Hugmyndin kom í fjölskylduboði

"Við byrjuðum með 18 tilboð þegar við opnuðum síðuna og stefnum á að koma með ný tilboð á hverjum föstudegi," segir Valþór Örn Sverrisson, sem ásamt bræðrum sínum, Pétri Rúnari og Sverri Birgi Sverrissonum, stofnaði tilboðssíðuna asni.is í byrjun mánaðarins.

Asni.is er komin með rúmlega 1.800 notendur. Það kostar ekkert að skrá sig á síðuna og ekkert að nota tilboðin. "Við hugsuðum þetta fyrst þannig að við myndum rukka viðskiptavinina fyrir þjónustuna en svo sáum við að við kæmumst upp með að gera það ekki svo við völdum að gera það þannig frekar. Það þarf því aldrei að gefa upp neitt kreditkortanúmer eða neitt svoleiðis," segir Valþór, en innskráðir notendur geta notað tilboð síðunnar eins oft og þeir vilja á meðan þau eru í gildi. "Fólk gæti til dæmis fengið sér Línubát þrisvar sinnum á dag núna ef það væri mjög svangt," segir hann.

Notkun á síðunni er einföld og þarf aðeins að prenta út tilboðin og sýna þau til að fá þau í gegn. Þá þurfa snjallsímaeigendur aðeins að sýna mynd af tilboðinu í símanum sínum þegar þeir vilja nota það.

Bræðurnir fengu hugmyndina af síðunni í fjölskylduboði fyrir rúmu ári síðan en það var ekki fyrr en snemma á þessu ári sem þeir ákváðu að láta slag standa og koma henni upp. Spurður hvaðan nafnið komi segir Valþór það hafa gripið þá við skoðun á lista yfir laus lén á netinu. "Svo er aldrei að vita nema við höldum áfram og opnum í framtíðinni síður á við köttur.is eða geit.is," segir hann og hlær.- trs