Sigur Rós gaf UNICEF myndarlegan styrk

„Við erum mjög þakklát og ánægð með þetta,“ segir Sigríður Víðis Jónsdóttir hjá Barnahjálp Sameinuðu þjóðanna, UNICEF, á Íslandi. Umboðsmaður Sigur Rósar kom færandi hendi á skrifstofu samtakanna í vikunni og afhenti þeim 250 þúsund krónur sem söfnuðust á tónleikaferð hljómsveitarinnar um Evrópu sem er nýlokið. Þar spilaði hún fyrir framan rúmlega 100 þúsund manns á nítján tónleikum.

Í sölubás á hverjum tónleikum fyrir sig gátu þeir tónleikagestir sem voru snöggir til tryggt sér áritaða, notaða muni frá Sigur Rós, þar á meðal trommuskinn, trommukjuða eða gítarneglur, gegn ákveðnu lágmarksgjaldi. Allur ágóðinn rann til UNICEF en hljómsveitin er samtökunum að góðu kunn. Árið 2006 hélt hún til Svasílands í Afríku til að skoða HIV-verkefni UNICEF á svæðinu. Þar heimsóttu þeir félagar einnig miðstöð fyrir börn sem höfðu misst foreldra sína af völdum alnæmis, sóttu fund stuðningshóps HIV-smitaðra og fóru á leiklistarhátíð barna.

„Þetta er bara frábært. Sigur Rós þekkir starf UNICEF vel. Þeir hafa tengingu við okkur og eru búnir að vera frábærir í gegnum tíðina við að aðstoða okkur og vekja athygli fólks á neyð barna í heiminum,“ segir Sigríður. Stærri pakki með notuðum og árituðum munum var í boði á þremur síðustu tónleikum Sigur Rósar í Brixton Academy í London, eða trommukjuði frá Orra Páli Dýrasyni, brotinn sellóbogi frá söngvaranum Jónsa og gítarnögl frá Georg Holm. Lágmarksgjald var 150 pund, um þrjátíu þúsund krónur.

Fram undan hjá Sigur Rós er tónleikaferð um Norður-Ameríku sem hefst í næstu viku. Þar spilar sveitin í fyrsta sinn í Madison Square Garden í New York 25. mars fyrir framan tólf þúsund manns. Spilamennska á Coachella-hátíðinni í Kaliforníu er einnig fyrirhuguð 13. og 20. apríl.

Verið er að hljóðblanda nýjustu plötu hljómsveitarinnar og er hún væntanleg í búðir síðar á þessu ári.