Vitnisburður um vinnualka

„Þetta er að verða ógeðslega flott,“ segir Páll Óskar Hjálmtýsson um nýju heimasíðuna sína sem opnar á föstudaginn.

Á Palloskar.is verður allur hans ferill rakinn í tímalínu sem hefst á fæðingarári hans, 1970. Hægt verður að hlusta ókeypis á öll lögin sem hann hefur sjálfur gefið út, auk þess sem óútgefin lög, sjaldheyrðar upptökur, tónlistarmyndbönd, ljósmyndir og blaðagreinar frá 22 ára ferli hans fá sinn sess.

„Þú getur valið þau lög sem þú vilt, ýtt á play-takkann og farið svo að ryksuga heima hjá þér,“ segir Páll Óskar. „Þessi heimasíða er eiginlega vitnisburður um vinnualka. Það hefur komið sjálfum mér á óvart hvað þetta er búin að vera rosalega mikil vinna í gegnum tíðina.“

Popparinn tekur fram að þetta er ekki sölusíða og því verður hvorki hægt að kaupa lög, plötur né tónleikamiða á henni. Í staðinn ætlar hann að dekra við hina fjölmörgu aðdáendur sína með því að uppfæra hana reglulega og frumflytja þar ný lög eða tónlistarmyndbönd þegar sá gállinn er á honum. „Það eru nokkrar smáskífur í augsýn. Þetta er eitthvað sem ég ætla að spila út smám saman,“ segir hann en vill ekki lofa nýrri plötu fyrir jólin enda brjálað að gera við tónleikahald.

Palli kann strákunum hjá Wedo, þeim Guðmundir Ragnari Einarssyni, Charles Christie og Orra Helgasyni, bestu þakkir fyrir að hanna fyrir sig Palloskar.is en sú vinna hefur staðið yfir í þrjá mánuði. Heimasíðan verður einmitt afhjúpuð í höfuðstöðvum Wedo. -fb