Grant hlaðinn lofi í Bretlandi

Breskir tónlistargagnrýnendur eru yfir sig hrifnir af nýjustu plötu Johns Grant, Pale Green Ghosts, sem kemur út á mánudaginn.

Bandaríski tónlistarmaðurinn, sem er búsettur hér á landi, tók plötuna upp í Reykjavík í samstarfi við Bigga Veiru í GusGus eins og Fréttablaðið hefur greint frá.

Blaðamaður The Guardian gefur plötunni fullt hús, eða fimm stjörnur. „Það segir sitt um snilld Grants sem lagahöfundar að það er erfitt að ímynda sér að það kom út ánægjulegri og meira gefandi klukkustund af tónlist á þessu ári en Pale Green Ghosts,“ skrifar hann og bætir við að textarnir séu stórkostlegir, uppfullir af góðum myndlíkingum, og að Grant noti skopskynið á hárréttum stöðum.

Gagnrýnandi BBC hreifst einnig upp úr skónum. „Hið óvænta við þessa plötu er að lög Grants virka vel og jafnvel betur en áður með öllum hljóðgervlunum.“

Vefsíðan Musicomh.com gefur Pale Green Ghosts fimm stjörnur og segir hana mikið afrek og byggja á því sem Grant hafi gert áður um leið og hún víkki sjóndeildarhringinn. „Þetta er án efa ein besta plata ársins.“

Drowned in Sound gefur 7 af 10 í einkunn og segir lagið Why Don‘t You Love Me Anymore? með Sinead O‘Connor í gestahlutverki vera hápunkt plötunnar. Time Out gefur henni 4 af 5 og segir hana gullfallega og sorglega á sama tíma.