Finn til samkenndar með tíkinni minni

„Maður getur auðvitað ekki vitað hvernig það er að vera hundur, en ég finn að minnsta kosti til samkenndar með tíkinni minni,“ segir leikkonan Ólöf Hugrún Valdimarsdóttir. Hún fer með hlutverk í leikverkinu Hundalógík, sem frumsýnt verður í Þjóðleikhúskjallaranum annað kvöld. Leikstjóri er Bjartmar Þórðarson og aðrir leikarar eru Jón Stefán Sigurðsson, Ingi Hrafn Hilmarsson og Jón Svavar Jósefsson.

Hundalógík er eintalasafn þar sem hugarheimur hunda er kannaður. Ólöf Hugrún leikur Golden Retriever-tík og Beagle-hund sem vinnur hjá tollinum. Áhorfendur fá einnig að kynnast Jack Russell Terrier sem er sísvangur og blendingshundi sem hefur gaman af því að gramsa í ruslatunnum.

Æfingar á verkinu hófust fyrir jól og að sögn Ólafar Hugrúnar munu leikararnir ekki gerast mjög bókstaflegir í túlkun sinni á hundunum. „Við tölum mannamál og erum í fötum á sýningunni. Til að undirbúa okkur fyrir hlutverkið skoðuðum við bæði karakterana sem við leikum og hundategundirnar sjálfar. En svo tala sögurnar sínu máli,“ útskýrir hún.

Ólöf Hugrún segir leikarana fjóra vera mikla hundavini, þó að sjálf eigi hún aðeins ketti. „Ég hef átt hund, Jón Stefán hefur átt hund og Jón Svavar ólst upp í sveit og er jafnframt sá eini sem hefur verið bitinn af hundi. Mamma mín á hund og það er alltaf gott að heilsa upp á hann þegar maður er niðurdreginn; hundar eru fallegar sálir sem vilja allt fyrir mann gera.“

Hún lýsir verkinu sem „tragikómedíu“ sem veki fólk til umhugsunar bæði á jákvæðan og neikvæðan hátt. „Það er fyndið að fólk sé að segja hundasögur en á sama tíma þá ráða menn algjörlega yfir þessum dýrum. Gleðin og sorgin haldast alltaf í hendur.“

Hundalógík er frumsýnt í Þjóðleikhúskjallaranum þann 10. mars. Einnig eru fyrirhugaðar sýningar 17. og 19. mars.