Kanye fúll með sjöunda sætið

Kanye West viðurkennir að vera óánægður með 7. sætið á lista MTV yfir bestu rappara heimsins. Í viðtali við bandarísku útvarpsstöðina Hot 97 sagðist hipphoppstjarnan viss um að sú ákvörðun að setja hann í sjöunda sætið hefði verið tekin á öðrum forsendum en verkum hans. West sagðist telja að persónuleiki sinn hefði haft áhrif á listann, en hann hefur oft á tíðum verið yfirlýsingaglaður og umdeildur.

Rapparinn sagðist þó ekki eiga efsta sæti listans skilið því Lil Wayne væri „rappari númer eitt í heiminum“.

Big Sean og Drake eru fyrir ofan West á lista MTV, en enn á eftir að tilkynna um efstu fjögur sætin.