Trúin á verkefnið skiptir mestu

Aðspurður segir Sigtryggur Baldursson, framkvæmdastjóri ÚTÓN, útflutningsskrifstofu íslenskrar tónlistar, að margir samverkandi þættir valda því að svona margir Íslendingar eru með plötusamninga erlendis.

„Gæði og magn tónlistar á Íslandi hefur farið mjög vaxandi. Fólk sér að aðrir geta farið úr landi með sína tónlist og hugsa með sér að þetta geti þeir nú líka. Fólk trúir því að þetta sé hægt og þar byrjar þetta allt. Trúin á verkefnið. Fyrirmyndir sem eru að gera hlutina á eigin forsendum," segir Sigtryggur. „Þetta er hluti af útflutningsbylgjunni sem hefur farið vaxandi síðustu ár. Það er margt sem kemur til, þekking íslenskra tónlistarmanna á erlenda geiranum fer vaxandi og „kontaktar" í leiðinni. Iceland Airwaves og ÚTÓN hefur líka áhrif og þekkingin í bransanum vex."

Eins og gefur að skilja hafa slíkir samningar mikla þýðingu, bæði fyrir samfélagið og fyrir listamennina. „Íslenska tónlistin er orðin hörkufín útflutningsvara eins og fiskur, skyr, kjöt og rafmagn. Ef fólk heyrir að eitthvað er frá Íslandi sperrir það eyrun. Þetta hefur jákvæð áhrif á ímynd og efnahag landsins, því tónlistin kynnir landið mikið út á við, því hún er svo áberandi og fer svo víða. Túristar trúa því að hér búi skapandi og áhugavert lið."-fb