Galinn skemmtiþáttur með stórum vinningum

„Þetta verður algjörlega galinn skemmtiþáttur, blanda af leikjum og sjónvarpslotteríi í beinni útsendingu," segir Hilmar Björnsson, dagskrárstjóri Skjás Eins um nýjan þátt sem er í burðarliðnum og nefnist Megalotterí.

Þættirnir eru að einhverju leyti að erlendri fyrirmynd og verða fjölskylduþættir. Það er framleiðslufyrirtækið Stórveldið sem sér um að framleiða þættina fyrir Skjá Einn og stefnt er á að fyrsti þátturinn fari í loftið 27.mars. Hilmar segist vongóður um vinsældir þáttanna.

„Þættirnir verða í beinni útsendingu í opinni dagskrá snemma kvölds svo öll fjölskyldan getur fylgst með. Allir geta svo tekið beinan þátt í sjónvarpslotteríinu gegnum smáskilaboð," segir Hilmar og bætir við að vinningarnir verði ekki af verri endanum. „Vinningarnir eru rosalegir. Ég leyfi mér að fullyrða að vinningar af þessari stærðargráðu hafa ekki áður verið gefnir í beinni útsendingu í íslensku sjónvarpi. Allt frá stórum ferðavinningum til bíla og svo verða líka aðeins undarlegri vinningar eins og ársbirgðir af kattamat."

Ekki er komið í ljós hver mun stjórna Megalotteríi en verið er að prufa nokkra þessa dagana og ætti það að komast í ljós á næstu dögum. Sigmar Vilhjálmsson hjá Stórveldinu er spenntur að ráðast í verkefnið. „Það er spennandi að halda úti vikulegum skemmtiþætti í beinni útsendingu, því í slíkum þáttum getur allt gerst. Sambærilegir þættir hafa gengið áratugum saman um allan heim og nú er komið að Íslandi."