Vinsæl vöðvabúnt

Vöðvabúntin og testósteróntröllin Arnold Schwarzenegger og Sylvester Stallone virðast eiga níu líf í kvikmyndabransanum. Þrátt fyrir að vera komnir vel á sjötugsaldurinn leika þeir báðir í nýjum hasarmyndum sem eru komnar í bíó hérlendis. Schwarzenegger í The Last Stand og Stallone í Bullet to the Head.

Hér áður fyrr voru þeir tvær af heitustu hasarmyndhetjum heimsins eftir að hafa túlkað Rocky, Rambó, Tortímandann og villimanninn Conan eins og þeim einum er lagið. Núna, rúmum fjörutíu árum eftir að þeir hófu feril sinn, eru þeir enn að og virðast ekkert ætla að slaka á í bráð.

Báðir gengu þeir í gegnum þurrkatímabil. Hjá Stallone stóð það yfir í rúman áratug, eða til ársins 2006 þegar hann ákvað að draga upp boxhanskana að nýju í sjöttu myndinni um Rocky. Síðan þá hefur honum gengið allt í haginn. Endurkoma Rambo 2008 gekk vel og The Expendables-myndirnar hans tvær hafa báðar hitt í mark. Sú þriðja er einmitt í undirbúningi en Schwarzenegger lék einmitt nokkuð stórt hlutverk í henni.

Schwarzenegger átti erfið ár frá 1997 þegar hann lék í hinni misheppnuðu Batman & Robin þangað til árið 2003 er hann lék Tortímandann í þriðja sinn við góðar undirtektir. Eftir að hafa tekið sér hlé frá kvikmyndaleik til að sinna starfi ríkisstjóra Kaliforníu sneri Schwarzenegger aftur. Að sjálfsögðu eru gamlir kunningjar handan við hornið hjá honum því The Legend of Conan á að koma út á næsta ári, auk þess sem hann hefur verið orðaður við hlutverk í Terminator 5.