Búðir stuðningsmanna Morsís rýmdar

Egypskar öryggissveitir réðust til atlögu í morgun gegn stuðningsmönnum Múhameds Morsís og rýmdi mótmælendabúðir þeirra á tveimur stöðum í Kaíró.

Til harðra átaka kom en tölum um mannfall og fjölda særðra ber engan veginn saman.

Að sögn stjórnvalda eru á annan tug manna látnir að að minnsta kosti áttatíu særðir, en Bræðralag múslima segir að meira en 500 manns hafi látið lífið og meira en níu þúsund særðir.

Arabíska fréttastöðin Al jazeera talar um að tugir séu látnir.

Stuðningsmenn Morsís, mestanpart liðsmenn Bræðralags múslima, hafa hafst meira og minna við á tveimur stöðum í Kaíró allar götur síðan honum var steypt af forsetastóli í byrjun júlí.