17 ára gamalt met í sjónmáli

Karlalandslið Íslands getur á morgun jafnað sinn besta árangur í undankeppni HM. Það gera strákarnir okkar ef þeir gera jafntefli eða vinna sigur á Króötum á Laugardalsvelli.

Ísland hefur mest spilað fimm leiki án þess að tapa í undankeppni HM 1994 og 1998. Liðið getur jafnað metið á morgun og um leið átt þess kost að bæta metið í Zagreb á þriðjudag.

Strákarnir okkar eru taplausir frá því Slóvenar unnu 4-2 sigur á Laugardalsvelli í júní. Frá 4-4 endurkomunni í Bern hefur gengi liðsins verið frábært.

Hér að neðan má sjá samantekt yfir besta gengi íslenska karlalandsliðsins í undankeppni HM í gegnum tíðina.