Lindsay Lohan ekki í fangelsi

Leikkonan Lindsay Lohan mætti fyrir rétt í Los Angeles í gær, en henni var gefið að sök að hafa logið að lögreglumönnum um aðild sína að umferðarslysi og þar með brotið skilorð.

Þáði hún boð ákæruvaldsins um að játa á sig sök og sleppa við fangelsisvist. Skuldbindur hún sig um leið til að fara í níutíu daga áfengismeðferð, gegna samfélagsþjónustu í þrjátíu daga og hitta sálfræðing í eitt og hálft ár.

Hún þarf að flytja á meðferðarstofnun eigi síðar en 2. maí, greiða 150 dollara sekt og ljúka tveggja ára skilorði sínu.

Dómarinn sagði Lohan að halda sig fjarri áfengi og fíkniefnum og fólki sem notaði slík efni, og að hún gæti átt von á því að leitað verði á henni reglulega af lögreglu.

Þrátt fyrir allt sleppur Lohan nokkuð vel frá réttarhöldunum, en töldu lögfróðir menn að hún þyrfti að sitja inni í þó nokkurn tíma fyrir að rjúfa skilorðið, en það fékk hún á sínum tíma fyrir búðarhnupl.