Hæstiréttur dæmir í máli Annþórs og Barkar í dag

Hæstiréttur mun dæma í líkamsárásarmáli Annþórs Kristjáns Karlssonar og Barkar Birgissonar klukkan fjögur í dag.

Annþór og Börkur hlutu sex og sjö ára fangelsisdóma í héraðsdómi í desember í fyrra fyrir hættulegar líkamsárásir, nauðung, fjárkúgun, frelsissviptingu og hótanir. Þeir áfrýjuðu þeim dómi til Hæstaréttar.

Annþór og Börkur voru dæmdir, ásamt átta öðrum, fyrir að ráðast á og hafa í hótunum við fjölmarga menn í þremur árásum. Þegar mál þeirra var tekið fyrir í Hæstarétti í lok síðasta mánaðar var lögreglan með töluverðan viðbúnað.

Enn á eftir að dæma í máli þar sem þeim er gefið að sök að hafa veist að samfanga sínum á Litla-Hrauni og veitt honum högg á kvið með þeim afleiðingum að hann lést.