Nauðsynlegt að efla þekkingu í líftækni

Nauðsynlegt er að auka þekkingu á síðari stigum nýsköpunar, annars er hætta á að missa áratuga þekkingu úr landi. Þetta segir formaður samtaka íslenskra líftæknifyrirtækja.

SÍL efndi til málstofu á Grand hótel í gær þar sem á annan tug líftæknifyrirtækja kynntu störf sín og rannsóknir. Líftæknigeirinn er ört vaxandi atvinnugrein sem krefst hás menntunarstigs og felur í sér hátt hlutfall afleidda starfa. Samhliða þessu er möguleikar á verðmætasköpun miklir.

Ágústa Guðmundsdóttir, formaður SÍL, segir mikla grósku vera í íslenskri líftækni. Það sé hins vegar nauðsynlegt að efla þekkingu á síðari stigum nýsköpunar, þá sérstaklega þegar markaðssetning er annars vegar. Annars sé hætta á að fyrirtækin haldi erlendis eftir að hafa slitið barnsskónum á Íslandi.

"Ef að fyrirtæki þurfa að fara í auknu mæli út fyrir landsteinanna þá er alltaf sá möguleiki að þau verði þar eftir. Það er hætta á að missa þessa þekkingu Það væri í rauninni hálf sorglegt ef við missum þau á síðari stigum þegar þau eru við það að fara að mynda mikinn arð."

Skortur er á rannsóknarfé og styrkjum hér á landi. Ágústa ítrekar að aðkoma lífeyrissjóðanna að nýsköpun ætti að vera mun meiri. 

"Þessi fyrirtæki munu taka stökkið, það er bara spurning hvort að þau geri það héðan eða erlendis frá."