Skallaði gólfið í Saskatoon

Sjokkrokkarinn síkáti, Marilyn Manson, fékk aðsvif á sviði í gærkvöldi fyrir framan fullt hús af fólki.

Atvikið átti sér stað á tónleikum söngvarans í Saskatoon í Kanada, en hann hafði ælt margsinnis meðan á tónleikunum stóð áður en hann féll í gólfið.

Samkvæmt upplýsingum vefsíðunnar TMZ hafði hann verið veikur fyrr um daginn, en ákvað þrátt fyrir það að syngja á fyrirhuguðum tónleikum, og því fór sem fór.

Manson, sem er nú ýmsu vanur, þverneitaði að fara á spítala, en hvíldi sig þess í stað á hótelherbergi sínu og hyggst koma fram á tónleikum í Calgary í kvöld.