Sigurður Ingi Jóhannsson sjávarútvegs- og landbúnaðarráðherra segir að refsiaðgerðir Evrópusambandsins gegn Færeyingum hafi ekki tekið gildi þótt greitt hafi verið fyrir því í sjávarútvegsnefnd sambandsins í dag að leggja viðskiptabann á Færeyinga. Sigurður Ingi býst ekki við að ESB kynni aðgerðir gegn Íslendingum vegna makrídeilunnar fyrir fund sem íslensk stjórnvöld boðuðu til í deilunni í byrjun september næst komandi.

„Nei, við eigum ekki von á því. Okkur þætti það enn undarlegra ef menn væru að velta fyrir sér einhverjum aðgerðum gagnvart okkur í ljósi þess að við höfum boðað til samningaviðræðna og allir aðilar, þeirra á meðal Evrópusambandið, hafa þekkst það boð núna í byrjun september. Fyrir þann tíma finnst okkur það ekki bara ólíklegt heldur afar sérkennilegt ef menn gripu til einhverra aðgerða á þeim tíma,“ segir sjávarútvegsráðherra.

Í boðuðum aðgerðum gegn Færeyingum er talað um innflutningsbann á síld og makríl frá Færeyjum og bann við sölu fiskiskipa, veiðarfæra og fleiru sem tengist sjávarútvegi frá Evrópusambandinu til Færeyja. Talað er um að þessar aðgerðir gætu verið fyrirmynd að aðgerðum gegn Íslendingum.

„Við höfum auðvitað bent á að allt annað en gagnkvæmt löndunarbann á makríl séu ólögmætar aðgerðir. Og það er okkur mikil vonbrigði með tilliti til alþjóðlegra samskipta að það sé líklegt að menn beiti slíkum þvingunum gegn Færeyingum,“ segir Sigurður Ingi.

Ráðherrann segir líka rangt að Íslendingar hafi ekkert lagt fram til lausnar deilunni.

„Evrópusambandið hefur því miður ítrekað haldið fram í alþjóðafjölmiðlum að við höfum aldrei lagt neitt til. Það er kolrangt. Við höfum ítrekað lagt til að allar þjóðirnar sameinist um að stilla veiðiþunga í samræmi við ráðgjöf með því að lækka kvóta sína, sem við höfum jafnframt gert. Við höfum líka lagt fram tillögur til úrlausnar og þótt þær hafi ekki þóknast samningsaðilanum er ekki sanngjarnt að segja að við höfum ekkert lagt til viðræðna,“ segir Sigurður Ingi. Íslendingar hafi lagt áherslu á að farið væri að ráðgjöf vísindamanna í öllum samningaumleitunum.