Dómari tók sér frest til morguns

Dómari við Héraðsdóm Norðurlands eystra tók sér frest til morguns til að úrskurða um gæsluvarðhald yfir tveimur piltum sem eru grunaðir um að hafa brotist inn til karlmanns á áttræðisaldri og ráðist á hann, samkvæmt upplýsingum frá lögreglunni á Akureyri.

Piltarnir voru leiddir fyrir dómara skömmu eftir hádegi í dag en farið var fram á vikulangt gæsluvarðhld yfir þeim. Sá sem ráðist var á hlaut alvarlega höfuðáverka en hann er afi annars piltanna.

Í haust var hann kærður fyrir að hafa beitt annað barnabarn sitt grófu kynferðisofbeldi. Það mál er nú til skoðunar hjá ríkissaksóknara.