Milljón í boði fyrir app fyrir Íslendingabók

Íslensk erfðagreining og Háskóli Íslands efna til samkeppni um app fyrir Íslendingabók Leitað er eftir hugmyndum og útfærslu á Íslendingabók fyrir snjallsíma. Keppt verður um hugmynd, hönnun, forritun og kynningu.

Keppnin er opin nemum í öllum háskólum á Íslandi og Íslendingum við nám í háskólum erlendis. Dómnefnd mun meta lausnir keppnisliða út frá frumleika, útliti, virkni og vinnubrögðum en jafnframt verður lagt mat á það hvernig liðin kynna lausnir sínar á samskiptamiðlum á meðal almennings.

Almenningi gefst kostur á að hafa áhrif á niðurstöðu keppninnar með því að taka þátt í skoðanakönnun á Facebook-síðu keppninnar.

Verðlaun að upphæð ein milljón króna eru í boði fyrir vinningsliðið og gert er ráð fyrir því að vinningslausnin verði nýtt sem viðbót fyrir Íslendingabók. Markmið keppninnar er að færa Íslendingabók enn nær þeim 200.000 notendum sem hafa aðgang að vefsíðunni.

Nánari upplýsingar má finna á vefsíðu keppninnar.