Hollywood logar! Fylgdarsveinn leysir frá skjóðunni

Chris Gaida er ekki þekkt nafn í Hollywood-bransanum en sumum gæti þótt andlit hans kunnuglegt. Hann hefur eytt síðustu fjórtán árum í það að vera fylgdarsveinn stjarnanna á hinum ýmsu viðburðum.

Hann er búinn að gefa út bókina Arm Candy: A Celebrity Escort's Tales From The Red Carpet þar sem hann uppljóstrar ýmsum stjörnuleyndarmálum af rauða dreglinum.

Chris hefur fylgt heimsfrægum stjörnum á borð við Cameron Diaz, Juliu Roberts og Brad Pitt á viðburði eins og Óskarsverðlaunin og Vogue-tískuverðlaunin.

Í bókinni segir hann til dæmis að Paris Hilton kjósi að mæta á svæðið klukkutímum fyrr til að taka sig til. Rétt áður en herlegheitin hefjast fer hún út um bakdyrnar, inn í glæsibifreið sem keyrir hana fyrir hornið á rauða dregilinn.

Þá skrifar hann líka um kynbombuna Sharon Stone og að hún sé ekkert lamb að leika sér við.

"Henni virtist ekki líka vel við mig – eða kannski átti hún slæman dag þegar ég var fylgdarsveinninn hennar. Hún heilsaði mér ekki og bað mig um að ganga fyrir framan hana og horfa ekki á sig," segir Chris. Enn verri sögu hefur hann að segja um söngkonuna Chaka Khan.

"Kannski sá hún mig ekki en ég fann hönd á bakinu mínu og síðan var mér ýtt harkalega þannig að ég skall með hægri öxlina á vegg og skyrtan mín rifnaði. Hún vildi ekki að ég væri fyrir sér. Ég stóð þarna í nokkrar sekúndur en ég fékk aldrei afsökunarbeiðni."

Þú gætir unnið - vertu með okkur á Facebook.