Hasselhoff berst fyrir Berlínarmúrnum

Stórsöngvarinn og Baywatch-hetjan David Hasselhoff berst nú gegn því að síðustu leifar Berlínarmúrsins verði jafnaðar við jörðu.

Niðurrif múrsins hófst 9. nóvember 1989 og Hasselhoff kom fram á minnistæðum tónleikum við múrinn á gamlárskvöldi sama árs. Þar var fallinu fagnað og stóð Hasselhoff á múrnum sjálfum og söng lag sitt Looking for Freedom.

Þó meirihluti múrsins sé löngu farinn hefur lítill hluti hans staðið óhreyfður, en nú stendur til að rífa hann til þess að rýma fyrir byggingu íbúðarhúsnæðis.

Þetta eru margir ósáttir við og Hasselhoff, sem á ættir sínar að rekja til Þýskalands, er þeirra á meðal. Líkir hann niðurrifinu við það að hrófla við indíánagrafreit og segir múrinn nauðsynlegan minnisvarða um sundraðar fjölskyldur.

Í gær heimsótti leikarinn múrinn og flutti fyrrnefnt lag, og ekki er annað að sjá á meðfylgjandi myndskeiði en að lagið lifi enn í hjörtum Berlínarbúa.