Jöfnuður óvíða meiri í Evrópu

Munurinn á þeim tekjuhæstu og tekjulægstu hér á landi er með því minnsta sem gerist í Evrópu samkvæmt rannsókn Hagstofu Íslands.

Sá fimmtungur þjóðarinnar sem hæstar tekjur hafði á síðasta ári aflaði að jafnaði 3,4 sinnum hærri upphæðar en sá fimmtungur sem hafði minnstar tekjur. Jöfnuðurinn reyndist aðeins meiri í Noregi og Slóveníu samkvæmt samanburði Hagstofunnar á tölum frá öðrum ríkjum Evrópu.

Ójöfnuðurinn reyndist mestur á Spáni, þar sem sá fimmtungur þjóðarinnar sem mestar tekjur hagði aflaði meira en sjö sinnum hærri upphæðar en lægst launaðisti fimmtungurinn.

Hlutfall landsmanna sem eru undir lágtekjumörkum er lægst hér á landi af öllum ríkjum Evrópu. Um 7,9 prósent landsmanna voru í þessari stöðu. Aðeins hér á landi og í Tékklandi var hlutfallið undir 10 prósentum.

Þeir sem eru undir lágtekjumörkum eru með innan við 60 prósent af launum dæmigerðs launamanns. Fyrir einstakling á það við um þá sem voru með innan við 156 þúsund krónur í laun og bætur á mánuði á síðasta ári. Fyrir sambýlisfólk með tvö börn er miðað við þá sem voru með innan við 328 þúsund krónur.