England ætlar að sanna sig gegn Þýskalandi

Enska landsliðið hefur ýmislegt að sanna gegn Þjóðverjum á Wembley í kvöld og fyrirliðinn, Steven Gerrard, segir að liðið ætli að sanna Þjóðverjum hvaða framförum liðið hefur tekið undir stjórn Roy Hodgson.

Þetta verður fyrsti leikur þjóðanna síðan Þjóðverjar unnu 4-1 sigur á Englandi í sextán liða úrslitum HM árið 2010.

"Við erum betri í dag en við vorum þá. Ef við ættum að spila HM-leik gegn Þýskalandi á morgun þá myndum við ekki tapa 4-1," sagði Gerrard kokhraustur.

"Mér finnst við vera miklu sterkari í dag. Það er góð blanda eldri og yngri leikmanna í liðinu og liðið er í sífelldri framför."

Ef Þýskaland vinnur leikinn þá verður það í fyrsta skipti í 36 ár sem England tapar tveim leikjum í röð á Wembley.