Aron Einar: Ætluðum okkur meira

Aron Einar Gunnarsson, fyrirliði íslenska landsliðsins, var eðlilega súr í broti þegar að hann ræddi við Rúv skömmu eftir 2-0 tap Íslands gegn Króatíu í Zagreb í kvöld. Tapið þýðir að Ísland keppir ekki á HM í Brasilíu næsta sumar.

„Við ætluðum okkur meira og við ætluðum að gera betur. En við náðum ekki að koma okkar spili í gang í seinni hálfleik eins og við ætluðum að gera. Þetta eru bara vonbrigði - það er það eina sem hægt er að segja,“ sagði Aron Einar.

Hann segir að það hafi verið erfitt að taka öðru marki Króata, sem Dario Srna skoraði á 47. mínútu. Króatar voru þá búnir að missa Mario Mandzukic af velli með rautt spjald.

„Það sjokkeraði okkur. Við hefðum átt að halda boltanum betur en við gerðum í þessum leik. Það neikvæða var að sendingar misheppnuðust allt of oft og það má ekki gegn jafn sterku liði og Króatíu. Við hefðum átt að nýta okkur rauða spjaldið betur.“

„Við verðum bara að gera betur næst. Það er engin afsökun fyrir þessu en það þýðir ekkert annað en að einbeita sér nú að EM 2016. Við munum rífa okkur upp.“