„Hver hefur sinn karfa að slægja“

„Þetta skrifast alfarið á latte-lepjandi leikstjórann úr 101. Ég tek fulla ábyrgð á þessu og bið sjómenn og sjávarútveginn allan afsökunar,“ segir Guðmundur Þór Kárason, leikstjóri Eurovision-myndbandsins.

Í gær birtist í Fréttablaðinu viðtal við stýrimanninn Aríel Pétursson þar sem hann talaði um fáránleika þess að Eyþór Ingi skyldi slægja karfa í tónlistarmyndbandinu við lagið Ég á líf, enda sé karfi aldrei slægður. Í kjölfar fréttarinnar hefur Fréttablaðið fengið allnokkrar ábendingar frá aðilum innan sjávarútvegsins sem annaðhvort taka undir orð Aríels eða segja karfa stundum slægðan.

„Ég píndi Eyþór eiginlega út í þetta. Hann benti mér á vitleysuna í þessu en við vorum mjög tæpir með fisk svo ég lét listræn sjónarmið alfarið ráða yfir raunsæinu. Ég bjóst ekki við að þetta myndi draga dilk á eftir sér en annað hefur þó komið á daginn því það hefur dunið á manni eftir að myndbandið kom út,“ segir Guðmundur.

„Ég vil því hér með hreinsa mannorð og æru Eyþórs og vona að hann geti látið sjá sig á Dalvík aftur eftir þetta,“ bætir hann við og hlær, en Eyþór Ingi kemur frá sjávarplássinu Dalvík, er af sjómönnum kominn og hefur sjálfur sótt sjó margoft í gegnum árin. Hann ætti því að vera sjómannshnútunum vel kunnur.

Allt þetta uppþot hefur þó einnig leitt gott af sér því nýr málsháttur hefur orðið til: „Hver hefur sinn karfa að slægja.“ Segir Guðmundur hann mikið notaðan í kringum sig þessa dagana. Nú er bara spennandi að sjá hvort málshátturinn hafi orðið til í tæka tíð til að ná inn í einhver páskaeggjana í ár.