Full hús á Skonrokki og Sálinni um helgina

Margir af vinsælustu rokkurum landsins stigu á svið Silfurbergs í Hörpu á föstudagskvöldið. Þar voru haldnir svokallaðir Skonrokk-tónleikar undir merkjum hópsins Tyrkja Guddu.

Salurinn var þétt setinn af rokk-áhugamönnum og mikil stemning ríkti. Eyþór Ingi Gunnlaugsson, Páll Rósinkranz, Magni Ásgeirsson, Pétur „Jesú" Guðmundsson og Biggi Haralds fóru þar hamförum og með aðstoð hljómsveitarinnar tóku þeir nokkra góða rokkslagara við gríðarlega góðar undirtektir úr salnum. Áður en tónleikarnir hófust fengu aðstandendur Mottumars sviðið til afnota og afhentu þar verðlaun fyrir bestan árangur í átakinu, en alls söfnuðust 26.359.182 krónur til styrktar Krabbameinsfélagsins þetta árið.

Á laugardagskvöldið var svo komið að 25 ára afmælistónleikum Sálarinnar hans Jóns míns í Vodafonehöllinni. Stebbi og félagar sýndu það og sönnuðu að þeir eru ekkert að slakna með aldrinum og buðu aðdáendum sínum upp frábæra tónleika. Þar var dansað fram á rauða nótt og sungið hástöfum með hverju laginu á fætur öðru.