Bestu íslensku liðin stæðu vel í dönsku B-deildinni

Martin Rauschenberg, sem lék með Stjörnunni í Pepsi-deild karla í sumar, er með alla möguleika opna fyrir næsta tímabil.

Rauschenberg er á mála hjá danska liðinu Esbjerg en var í láni hjá Stjörnunni. Samningur hans við Esbjerg rennur þó út fyrir næsta tímabil og verður honum því frjálst að leita annað.

„Ég spilaði hvern einasta leik og tel að við stóðum okkur vel. Áður fékk liðið á sig 2,5 mörk í leik en í ár vorum við með næstbestu vörnina í deildinni,“ sagði Rauschenberg.

„Dvölin hefur verið virkilega góð og gagnleg. Ég tel að ég hafi staðið mig vel,“ bætti hann við.

Rauschenberg segir að íslensk lið æfi ekki eins og dönsk úrvalsdeildarlið. „Menningin er önnur á Íslandi hvað æfingar varða og gæðin ekki jafn mikil og í dönsku úrvalsdeildnni. Frekar líkari B-deildinni en ég tel að bestu liðin á Íslandi gætu verið í efri hluta hennar.“

Rauschenberg útilokar ekki að snúa aftur til Íslands fyrir næsta tímabil og segir að Stjarnan hafi sýnt sér áhuga, sem og önnur íslensk lið.

„Ég útiloka ekki neitt, hvorki hér heima né á Íslandi. Ég ætla að æfa vel og svo sjáum við til í vetur.“