Þýskaland hvílir lykilmenn gegn Englandi

Fjórir lykilmenn þýska landsliðsins í fótbolta verða ekki með liðinu þegar liðið mætir Englandi á Wembley í vináttulandsleik á þriðjudag. Til viðbótar við meiðsli Sami Khedira hafa fyrirliðinn Philipp Lahm, Manuel Neuer og Mesut Özil fengið að fara til félagsliða sinna.

Lahm og Neuer fóru beint til Þýskalands frá Milanó þar sem Þýskaland atti kappi við Ítalíu á föstudaginn. Özil fór með liðinu til London en hefur yfirgefið hópinn og farið til Arsenal þar sem hann fær langþráða hvíld.

Özil gat ekki æft mikið fyrir 1-1 jafnteflið á Ítalíu og ákvað Joachim Löw að hvíla hann gegn Englandi líkt og Lahm og Neuer sem báðir leika fyrir Bayern Munchen.

„Leikurinn gegn Englandi er síðasti möguleikinn okkar fyrir heimsmeistaramótið að reyna nýja taktík og leikmenn,“ sagði þýski þjálfarinn.

„Philipp Lahm, Manuel Neuer og Mesut Özil eru hluti af hryggjarstykki liðsins og fyrir mér er mikilvægt að gefa öðrum leikmönnum tækifæri í þessum stöðum, sérstaklega gegn sterkum andstæðingi eins og Englandi.“

Líklegt þykir að Roman Weidenfeller markvörður Borussia Dortmund fái tækifæri með landsliðinu í fyrsta sinn í fjarveru Neuer.