Gylfi bestur og skoraði fallegasta markið

Íslenska karlalandsliðið rétt missti af heimsmetinu þegar liðið tapað seinni umspilsleiknum á móti Króatíu á dögunum. Strákarnir héldu út í ellefu lotur af tólf ef við notum hnefaleikalíkingamál landsliðsþjálfaranna Lars Lagerbäck og Heimis Hallgrímssonar og undankeppni HM 2014 í Brasilíu er nú orðin sú sem aðrar undankeppnir verða hér eftir miðaðar við.

Íslenska landsliðið er að stærstum hluta skipað ungum og hungruðum leikmönnum sem mættu fullir sjálfstraust til leiks að þessu sinni og ætla sér ekki minni afrek í næstu framtíð. Það verður þó örugglega ekki auðvelt verk að gera betur en undanfarna fimmtán mánuði.

Þrír leikmenn íslenska liðsins voru inná allan tímann, það er spiluðu allar 90 mínúturnar í öllum tólf leikjunum. Þetta voru markvörðurinn Hannes Þór Halldórsson, miðvörðurinn Ragnar Sigurðsson og miðjumaðurinn Birkir Bjarnason. Aðrir leikmenn spiluðu minna þar sem leikbönn eða meiðsli áttu mikinn þátt í því að þeir gátu ekki verið með í öllum leikjunum.

Fréttablaðið gerir upp undankeppnina í þessari frétt og þar má finna nokkrar útnefningar blaðmanna íþróttadeildarinnar fyrir þá leikmenn sem stóðu upp úr í þessari einstöku undankeppni.

Besti leikmaðurinn

Gylfi Þór Sigurðsson átti frábæra undankeppni með íslenska landsliðinu. Hann var markahæsti maður liðsins (ásamt Kolbeini), hann var einnig sá sem gaf flestar stoðsendingar, enginn var með hærri meðaleinkunn í Fréttablaðinu og enginn leikmaður liðsins skoraði flest sigurmörk liðsins í keppninni (tvö í útileikjum á móti bæði Albaníu og Slóveníu).

Gylfi kom með beinum hætti að átta mörkum íslenska liðsins í undankeppninni, skoraði fjögur og lagði upp fjögur. Hann fékk níu í einkunn hjá Fréttablaðinu í þremur leikjum, á móti Slóveníu (úti), á móti Sviss (úti) og Albaníu (heima).

Fallegasta markið

Gylfi Þór Sigurðsson skoraði magnað mark beint úr aukaspyrnu í útleiknum á móti Slóveníu í mars. Mörkin hans Jóhanns Berg í Sviss eða sigurmark Gylfa beint úr aukaspyrnu í dembunni í Albaníu gerðu öll tilkall til þess að vera fallegasta markið.

Staðreyndin er hinsvegar sú að það er ekki hægt að skora mikið flottari mark en það sem Gylfi skoraði beint úr aukaspyrnu af 30 metra færi á Stozice-leikvagninum í Ljubljana.

Gylfi hitti boltann frábærlega og hann small af slánni og inn efsti í markhorninu, algjörlega óverjandi fyrir markvörð Slóvena.

Besta frammistaðan

Jóhann Berg Guðmundsson skoraði stórkostlega þrennu í 4-4 jafnteflinu á móti Sviss í Bern í september. Hvaða knattspyrnumaður sem er hefði getað verið að springa úr stolti yfir hverju þeirra marka hvað þá að skora þau öll í sama leiknum.

Jóhann Berg innsiglaði þrennuna og tryggði íslenska liðinu endurkomujafntefli með því að skora með glæsilegu langskoti í uppbótartíma leiksins. Jóhann Berg er fyrsti og eini íslenski landsliðsmaðurinn sem nær að skora þrjú mörk í sama leik í undankeppni stórmóts.

Óvæntasta útspilið

Ari Freyr Skúlason er sá leikmaður íslenska liðsins sem að okkar mati bætti sig mest í keppninni en Ari Freyr eignaði sér vinstri bakvarðarstöðuna þegar leið á undankeppnina.

Ari Freyr var þekktari sem miðjumaður með félagsliðum sínum en Lars Lagerbäck veðjaði á að skella honum í vinstri bakvörðinn með góðum árangri. Ari Freyr sýndi það í umspilsleikjunum við Króata hversu mikið hann hefur þroskast í þessari stöðu.

Spútnikstjarnan

Það vissu örugglega ekki margir hver Birkir Bjarnason var í upphafi undankeppninnar en endaði hana sem einn af markahæstu leikmönnum liðsins og eini miðju- og sóknarmaðurinn sem var inná vellinum alla keppnina.

Birkir átti reyndar ekki góða leiki í umspilinu við Króata en var fram af því búin að sanna sig sem lykilmaður liðsins.

Vinnusemin og dugnaðurinn var engu lík en jafnframt var hann einn af þeim leikmönnum liðsins sem reyndi alltaf að koma boltanum í spil.

Mikilvægasti leikmaðurinn

Íslenska landsliðið tapaði aðeins einum leik í undankeppnini með Kolbein Sigþórsson innanborðs og það var heimaleikur á móti Slóveníu þar sem liðið var án Gylfa Þórs Sigurðssonar (í leikbanni) og missti fyrirliðann Aron Einar Gunnarsson af velli í upphafi seinni hálfleiks í stöðunni 2-2.

Kolbeinn missti af upphafi keppninnar sem og síðasta einum og hálfa leiknum vegna ökklameiðslanna sem hann varð fyrir rétt fyrir hálfleik í fyrri umspilsleiknum við Króata. Ísland vann þrjá og gerði þrjú jafntefli í þessum sjö leikjum hans og Kolbeinn skoraði í fjórum síðustu leikjunum þar sem hann tók þátt í seinni hálfleik.

Heilaga þrenningin í íslenska landsliðinu

Mikilvægi þriggja leikmanna íslenska landsliðsins leynir sér ekki í tölfræði liðsins í undankeppni HM 2014. Þegar leiðtoginn Aron Einar Gunnarsson, leikstjórinn Gylfi Þór Sigurðsson og markamaskínan Kolbeinn Sigþórsson voru inn á vellinum var sóknarleikur íslenska liðsins í túrbó-gírnum.

Þeir félgar voru allir inná í 535 mínútur í leikjunum tólf í undankeppninni og þann kafla vann íslenska liðið 13-9. Þær 545 mínútur sem vantaði einhvern þeirra fóru hinsvegar 4-8 fyrir mótherjanna.

Íslenska liðið skoraði þannig á 41,2 mínútna fresti með Aron, Gylfa og Kolbein alla á vellinum en það liðu 136,3 mínútur á milli marka þann hluta undankeppninnar sem vantaði upp á heilugu þrenningu íslenska liðsins.