Nýtt myndband Bigga Hilmars frumsýnt á Vísi

Vísir frumsýnir hér nýtt myndband frá Bigga Hilmars við lagið Fool´s Mate. Það var tekið á óveðursdeginum mikla í byrjun mars og fangar íslenskan vetur á glæsilegan hátt. Tilviljun réði því að myndbandið var tekið á þennan hátt. Biggi hafði leigt stúdíómyndaver til að taka það upp en þegar óveðrið skall á að morgni 6. mars var ófært milli húsa. Þá voru góð ráð dýr og ákváðu Biggi og María Kjartans, sem tók myndbandið upp og klippti, að klæða sig í hlý föt og vaða út í óveðrið með tökuvél fyrir hana og gamalt orgel og stól fyrir Bigga. Þau fundu síðan fallegan stað við Sæbrautina og afraksturinn er glæsilegur. Bjarki Guðjóns sá um brellur. Lagið Fool´s Mate er af fyrstu sólóplötu Bigga, All We Can Be, sem kom út fyrir jól. Á henni eru ellefu lög eftir Bigga ásamt útgáfu hans á Famous Blue Raincoat eftir Leonard Cohen. Platan fékk flotta dóma hjá gagnrýnendum, meðal annars hér á Vísi.