Ronaldo jafnaði markamet Portúgala

Cristiano Ronaldo sýndi mátt sinn í HM-umspilinu. Hann skoraði öll fjögur mörk Portúgala gegn Svíum en Portúgal vann einvígið, 4-2.

"Við vorum betra liðið í báðum leikjunum. Ég er ánægður að hafa getað hjálpað liðinu. Við áttum þetta algjörlega skilið," sagði Ronaldo.

Ronaldo hefur aldrei verið valinn besti knattspyrnumaður heims en á góðan möguleika á því núna. Atkvæðagreiðslunni átti að ljúka í síðustu viku en var frestað til loka mánaðarins. Þessi frammistaða mun því hjálpa Ronaldo í kjörinu.

"Mitt líf er ekki þannig að ég hugsi bara um titla og viðurkenningar og ég þarf ekki að sanna neitt fyrir neinum. Ég hef fyrir löngu sannað mig. Ég skora 40 til 50 mörk á ári og það geta fáir. Ég veit vel hversu góður ég er."

Leikurinn var æsispennandi er Zlatan skoraði tvö mörk og kom Svíum yfir. Þá tók Ronaldo yfir á ný og kláraði leikinn. Leikjunum var stillt upp sem einvígi á milli þessara kappa en Ronaldo leit ekki á það þannig.

"Ég er ekki að keppa gegn Zlatan. Hann er frábær leikmaður og stærsta stjarna Svía. Ég keppi ekki við hann. Ég spila bara fyrir mitt lið."

Ronaldo jafnaði í gær markamet Pauleta fyrir portúgalska landsliðið en báðir hafa skorað 47 mörk fyrir landsliðið.

"Met eru til þess að slá þau en ég var ekkert að hugsa um það. Ég ætlaði bara að vinna leikinn."