Liðsfélagarnir hrósuðu Hart

Markvörðurinn Joe Hart fékk að spila fótbolta á nýjan leik í gær er hann stóð á milli stanganna hjá enska landsliðinu gegn Þjóðverjum.

Hart hefur setið á bekknum hjá Man. City síðustu vikur en hann byrjaði tímabilið ekki vel. Hann átti þó fínan leik í gær og uppskar hrós frá félögum sínum.

"Ég hef alltaf staðið við bakið á Joe og slíkt hið sama hafa aðrir leikmenn landsliðsins gert. Hann hefur verið gagnrýndur svolítið og á stundum of harkalega. Hann er stór strákur og hann getur aðeins þaggað niður í gagnrýnisröddum með því að spila vel," sagði Phil Jagielka, leikmaður Everton og enska landsliðsins.

Chris Smalling, leikmaður Man. Utd, tók í sama streng.

"Mér fannst hann standa sig virkilega vel í leiknum. Hann varði nokkrum sinnum mjög vel og bjargaði mér einu sinni fyrir horn. Mér fannst hann vera flottur."