Margir nýta sér síldina í Kolgrafarfirði

Búist er við að síldarævintýrið haldi áfram í Kolgrafafirði í dag og að félagasamtök muni safna þar síld til sölu og vinnslu í minkafóður. Sjómenn hafa líka verið að sækja þangað síld til beitu og bændur til fóðurbætis.

Athygli vekur að bændur hafa ekki gripið tækifærið og sótt síld til áburðar á tún, en síldin er að sögn kunnugra, afbragðs áburður. Að sögn bónda, sem fréttastofan ræddi við, óttast þeir að lenda í klóm reglugerðarfargansins, eins og þeir orða það. Það muni til dæmis geta fallið undir strangar reglur umhverfisyfirvalda um förgun úrgangs.

Þá geri heilbrigðisreglugerðir ráð fyrir að það verði að plægja síldina ofan í túnin, sem ekki sé hægt þegar klaki er í jörðu, og loks kunni Fiskistofa að gera athugasemdir við að bændur eigi ekki kvóta fyrir síldinni.