Stjörnum prýddur David Bowie ytra

Breskir fjölmiðlar eru yfir sig hrifnir af The Next Day, fyrstu plötu Davids Bowie í áratug. Alls staðar fær platan fimm eða fjórar stjörnur og telja sumir hana jafnast á við hans bestu verk.

Gagnrýnandi The Telegraph gefur henni fimm stjörnur og segir hana grípa mann heljartökum undir eins og sé ópus sem er sveipaður dulúð. Blaðamaður The Independent gefur einnig fimm stjörnur og fullyrðir að Bowie hafi sent frá sér bestu endurkomuplötu rokksögunnar. „Þetta er plata sem sem fjallar um vandamál heimsins og yfirborðskenndar stjörnur í fjölmiðlum.“ Gagnrýnandi tímaritsins Q er einnig í skýjunum og splæsir fimm stjörnum, eða fullu húsi, á plötuna.

The Guardian gefur The Next Day fjórar stjörnur og segir að efasemdarmenn gætu sett út á einfaldleika plötunnar. Tónlistin sé í anda verka Bowie á áttunda áratugnum en jafnist ekki á við þau. Hann bætir samt við að platan fái mann til að hugsa, sé skrítin og uppfull af góðum lögum. Gagnrýnandi The Times er einnig jákvæður, segir plötuna frábæra og dularfulla og gefur henni fjórar stjörnur. Þá gefur NME The Next Day átta af tíu mögulegum.

The Next Day kemur út um miðjan mars. Annað smáskífulagið af plötunni, The Stars (Are Out Tonight), er nýkomið út en með aðalhlutverk í myndbandinu fer Hollywood-leikkonan Tilda Swinton.