Þetta myndband kemur þér í gírinn fyrir leikinn

„Þetta tók okkur tvær vikur, það fór mikil vinna í þetta,“ segir Anton Sigurbjörnsson, sem ásamt félaga sínum, gerði skemmtilegt myndband í tengslum við landsleik Íslands og Króatíu í kvöld.

Þeir hermdu eftir nokkrum mörkum Íslands í undankeppninni í tölvuleiknum FIFA 14.

„Við ákváðum að gera þetta því það er hægt að sækja lið á netinu. Við hugsuðum að það væru svo margir sem myndu spila þennan leik, og það eru ekki allir sem gera sér grein fyrir því að hægt sé að ná í íslenska liðið. Svo varð þetta bara flottara og flottara, og þegar maður setti lag og lýsingarnar undir, þá leið manni vel að sjá þetta," segir hann.

Eins og áður segir fór mikil vinna í þetta hjá strákunum, en Hámundur Örn Helgason aðstoðaði Anton við gerð myndbandsins.

„Við þurftum til dæmis að taka 70 aukaspyrnur með Gylfa til þess að fá þetta rétt,“segir hann.

Þá fór töluverð vinna í að vinna lýsingarnar undir.

„Það var nú meira vesenið, sérstaklega í útileikjunum, því sjónvarpsstöðvarnar mega bara sýna leikinn í ákveðinn tíma. Eins og í markinu hjá Jóhanni Berg þá var ég bara að hlusta á einhvern útvarpsþátt og datt inn á þessa lýsingu,“ segir hann.

„Við reyndum að hafa þetta sem raunverulegast, eins og til dæmis í Albaníu-leiknum þá var mikil rigning og völlurinn þungur. Við erum nokkuð sáttir með útkomuna,“ segir hann.

Anton býr fyrir Norðan og kemst því ekki á leikinn í kvöld.

„Ég fékk ekki miða, svo ég verð bara að horfa á leikinn í sjónvarpinu. Ég er búinn að spá 2-1 fyrir okkur. Það gengur ekki vel að verjast, svo við verðum að blása til sóknar eins og hefur reynst okkur svo vel hingað til en ég vona að við höldum hreinu,“ segir hann.