Það er auðvelt að pirra Zlatan

Það er gríðarleg spenna fyrir leik Portúgals og Svíþjóðar í umspili HM í kvöld. Svíinn Zlatan Ibrahimovic hefur verið fyrirferðamikill í portúgölskum fjölmiðlum. Reyndar mætti halda að hann væri eini leikmaður sænska liðsins miðað við umfjöllunina í Portúgal.

"Ég hef spilað á móti honum. Hann er allur pakkinn. Hraður og hættulegur. En hann er ekki einn að spila, það má ekki gleyma því," sagði Ricardo Costa, leikmaður Portúgals.

Leikmenn Portúgal hafa allir talað fallega um Zlatan og hrósað honum. Hann mun þurfa að berjast við þá Pepe og Bruno Alves í kvöld.

"Þetta verður sprengja," sagði Nani, leikmaður Man. Utd og Portúgals, og sló saman höndunum er hann talaði um þetta einvígi.

"Þetta verður alvöru slagur. Eitthvað fyrir áhorfendur að fylgjast með."

Fyrrum landsliðsmaður Portúgals, Fernando Meira, hefur uppljóstrað hvernig sé best að stöðva Zlatan.

"Hann er með risastórt egó og það er auðvelt að pirra hann. Það á Portúgal að nýta sér. Ef einhver neglir hann niður þá verður hann reiður. Það verður að láta hann vita af því strax að hann muni ekki komast upp með neitt í leiknum."

Leikur liðanna er í beinni á Stöð 2 Sport í kvöld og hann er einnig í beinni textalýsingu á Vísi.