Meistarakokkurinn stígur sín fyrstu skref

Gunnar Helgi Guðjónsson bar sigur úr býtum í þáttunum MasterChef Ísland sem sýndir voru á Stöð 2 og fékk nafnbótina Meistarakokkur Íslands. Í gær var sérstakur MasterChef-matseðill sem Gunnar Helgi hannaði afhjúpaður á veitingastaðnum Nauthóli.

Það kennir ýmissa grasa á matseðlinum og er til dæmis hægt að fá sér saltfisksalat og grillaðan lax. Rúsínan í pylsuendanum eru klárlega eftirréttirnir en súkkulaðiommilettan fræga er á sínum stað. Ommilettan vakti gríðarlega athygli í MasterChef Ísland þáttunum en Gunnar Helgi vann einmitt ommilettuáskorunina með þessum sérstaka rétti.

Gunnar Helgi er byrjaður að vinna á veitingastaðnum Nauthóli til prufu og ef allt gengur eftir býðst honum starf þar sem kokkur.

Þegar Lífið kíkti við á Nauthóli í gær var Gunnar Helgi í óðaönn að undirbúa girnilega rétti fyrir matargesti sem eiga eflaust eftir að hitta í mark.

Dómararnir þrír voru á sínum stað, þau Friðrika Hjördís Geirsdóttir, Ólafur Örn Ólafsson og Eyþór Rúnarsson, en sá síðast nefndi er einmitt yfirmatreiðslumaður á Nauthóli. Gáfu þau Gunnari Helga góð ráð og hjálpuðu honum að taka sín fyrstu skref í atvinnumannaeldhúsi.

Facebook-síða MasterChef Ísland.

Þú gætir unnið - vertu með okkur á Facebook.