Hitti Tom Cruise

Það er ekki á hverjum degi sem Íslendingar hitta kvikmyndastjörnu eins og Tom Cruise. Hvað þá að fá tekna mynd af sér með henni eins og Sólveig Pálmadóttir hársnyrtimeistari og viðskiptalögfræðingur á Selfossi upplifði síðasta sumar þegar hún hitti leikarann og börnin hans í fjórhjólaferð. Við fengum leyfi hjá henni fyrir myndbirtingunni og forvitnuðumst að sama skapi hvernig hún upplifði sjálfan Tom Cruise.

Bauðst til að láta taka mynd

"Myndin var tekin í lok júní þegar Tom kom til okkar Unnars í fjórhólaferð hjá Óbyggðaferðum síðasta sumar. Kvikmyndafyrirtækið Truenorth sá um að skipuleggja ferð hans til okkar en myndin er tekin á Hungurfitjaleið norðaustan Tindfjalla. Við vorum stopp þarna að virða fyrir okkur útsýnið, skoða fegurð náttúrunnar og taka myndir þegar hann bauð mér að stilla mér upp með sér. Þannig kom nú þessi mynd til."

Laus við stjörnustæla

Hvernig virkaði Tom á þig? "Það fyrsta sem ég tók eftir er að hann er miklu myndarlegri í raunveruleikanum en í kvikmyndum. Tom kom okkur skemmtilega á óvart að því leiti að það vottaði ekki fyrir því sem fólk kallar stjörnustæla Hann virkaði meira á mig eins og pabbi sem var að eiga góðan dag með syni sínum, Connor. Nokkrum dögum seinna hittum við líka Isabellu dóttir hans," segir Sólveig.