Ísland í tísku

Úr með mynd af útlínum Íslands frá Great North hafa vakið mikla lukku síðustu vikur. Fyrirtækið var stofnað í janúar af sex framhaldsskólanemum í Verslunarskóla Íslands.

Krakkarnir segja hugmyndina hafa kviknað í áfanga sem heitir frumkvöðlafræði. Þar áttu þau að stofna fyrirtæki en höfðu mjög frjálsar hendur um hvernig þau færu að því. „Þegar við byrjuðum á þessu verkefni vorum við ákveðin í því að vinna með Ísland því það er mikið í tísku í dag. Við vissum af úraframleiðandanum May 28th og vorum mjög hrifin af því sem þau voru að gera. Við ákváðum að láta slag standa, höfðum samband við þau og spurðum hvort þau gætu framleitt fyrir okkur úr eftir okkar hönnun. Það gekk eftir og við tók mikill undirbúningur og ákvarðanatökur um hvernig við vildum hafa úrin. Við erum öll mjög sátt við útkomuna, úrin eru með svartri og mynd af Íslandi fyrir miðju á skífunni."

Hvernig hafa viðbrögðin verið? „Okkar markmið var að úrin yrðu ódýr og lúkkuðu líka vel. Viðbrögðin við þessu hafa verið fáranlega góð og öll úrin eru uppseld eins og er, en ný sending af þeim er væntanleg þá þegar. Úrin eru til sölu í gegnum facebook og við erum að vinna að því að koma þeim inn í ferðamannabúðir í sumar."

Hvað með framhaldið? „Það eru spennandi tímar framundan og Great North er að vinda upp á sig. Við erum með mikið af hugmyndum sem við höfum hannað nú þegar og erum að vonast eftir að fá í hendurnar í byrjun sumars. Þar má nefna úr með norðurljósum, lopapeysumynstri og margt fleira."

Great North á facebook.