Allt seldist upp hjá Elínu Hirst

"Eins og menn sáu fyrir helgi var þetta mikið magn af fatnaði og skóm og ýmsum fylgihlutum. Ég þurfti að leigja mér heilan sendiferðabíl undir þetta og var á tíma með þrjár aðstoðarkonur. Ég var svo heppin að fá góðan bás alveg við innganginn í Kolaportið og það hjálpað líka mikið," segir Elín Hirst þegar við spyrjum hana hvernig gekk að selja nánast öll fötin sín í Kolaportinu um helgina eins og við sögðum frá fyrir helgi.

"Fötin voru mjög ódýr og margir gerðu afar góð kaup þarna held ég. Mest var traffíkin fyrst þegar við opnuðum og þá fór margt af því flottasta fljótt, en það var svo mikið úrval að ég held að menn hafi verið að gera góð kaup alveg fram á síðustu stundu. Ég afgreiddi til dæmis konu um þrjúleytið sem keypti tvær fallegar kápur, eina bleika og eina ljósbláa, sem klæddu hana afar vel á 5000 krónur."

"Viðskiptavinirnir voru yndislegir og gengu glaðir á braut að mér sýndist. Klukkan fjögur voru þrjú eða fjögur stykki eftir, allt hitt seldist upp. Ágóðinn fer til velferðarmála eins og ég hef áður sagt," segir Elín ánægð með daginn.