Eina sem vantar á nýja Nike-búninginn er sjötta stjarnan

Nike kynnti í gær búninginn sem Brasilíumenn munu spila í á heimavelli næsta sumar þegar Brasilía heldur Heimsmeistaramótið í fótbolta í fyrsta sinn 64 ár.

Luiz Gustavo, miðjumaður Wolfsburg og brasilíska landsliðsins, var í hlutverki fyrirsætu þegar búningurinn var gerðu opinber með viðhöfn í Ríó.

Nýja brasilíska landsliðstreyjan er mjög klassísk í hönnum. Luiz Felipe Scolari, þjálfari Brasilíu, var sáttur með búninginn fyrir utan eitt. „Treyjan lítur vel út og það eina sem vantar er sjötta stjarnan. Við stefnum á það að bæta henni við eftir HM næsta sumar," sagði Luiz Felipe Scolari.

Brasilíumenn hafa orðið fimm sinnum heimsmeistarar í fótbolta (1958, 1962, 1970, 1994 og 2002) og eru með stjörnu á búningnum fyrir hvern heimsmeistaratitil.

Brasilíska landsliðstreyjan er söluhæsta Nike-treyjan fyrir utan Bandaríkin og forráðamenn Nike spá því að árið 2017 verði Brasilía orðin þriðji stærsti markaður fyrirtækisins á eftir Bandaríkjunum og Kína.

Nike er með samning við tíu þjóðir á HM 2014 eða tveimur fleiri en þýsku fyrirtækin  Adidas og Puma. Fjórar efstu þjóðirnar á FIFA-listanum, Spánn, Þýskaland, Argentína og Kólumbía, spila hinsvegar allar í Adidas-búningum.

Hér fyrir neðan má sjá myndir af nýja búningnum.