Kolbeinn: Ef við náum okkar leik getum við strítt Króötunum

„Nei, engir takkaskór í dag, bara rólegheit hjá mér,“ sagði Kolbeinn Sigþórsson, leikmaður íslenska landsliðsins, á Kópvogsvelli í gær.

Kolbeinn tók ekki þátt á æfingunni í gær vegna mikils álags hjá leikmanninum undanfarið með félagsliði sínu Ajax.

Íslenska landsliðið kom saman á sinni fyrstu æfingu fyrir umspilsleikina við Króatíu á Kópavogsvelli í gær en liðið mætir því króatíska á föstudagskvöld á Laugardalsvellinum. Þau mætast síðan aftur ytra á þriðjudagskvöldið eftir viku.

„Ég hef verið að spila marga leiki síðustu vikur og verið því undir miklu álagi og því er gott fyrir mig að fá þennan dag í frí.“

„Ég er í góðu standi og hlakka gríðarlega til að spila þennan leik, það verður ekki erfitt að gíra sig upp fyrir svona stórleik.“

„Við eigum bara fína möguleika í Króatana. Þeir eru vissulega með sterkt lið en við erum það líka. Ef við náum okkar leik þá getum við vel strítt Króötunum.“

Hægt er að sjá myndband af viðtalinu við Kolbein í spilaranum hér að ofan.