Fótboltabullum hugsanlega snúið við á Keflavíkurflugvelli

Öryggisgæsla verður hert til muna fyrir landsleik Íslands og Króatíu á föstudaginn. Til greina kemur að stöðva óæskilega stuðningsmenn króatíska liðsins á Keflavíkurflugvelli og vísa þeim þaðan úr landi.

Króatíska knattspyrnusambandið fékk eitt þúsund miða fyrir leikinn sem þeir selja svo áfram til stuðningsmanna sinna. Einungis þeir sem ekki hafa orðið uppvísir að ólátum á knattspyrnuvöllum geta keypt miða. Menn hafa því ekki mikla áhyggjur af þeim stuðningsmönnum, heldur þeim hópi sem kemur til landsins án miða. Lögreglan á höfuðborgarsvæðinu og KSÍ eru í nánu sambandi við kollega sína í Króatíu.

„Við höfum semsagt fengið frá þeim lista yfir stuðningsmenn króatíska landsliðsins sem hafa ekki heimild til að kaupa miða hjá þeim og þeir flokka sem hættulega áhorfendur. Við vitum því hverjir þeir eru og þeir munu láta okkur vita um einstaklinga sem eru að reyna að fara," segir Víðir Reynisson, yfirmaður öryggismála hjá KSÍ.

Víðir segir að ekki sé vitað fyrir víst hvort einhverjir á þessum lista séu á leið til landsins.

„En sagan sýnir okkur að alls staðar þar sem króatíska landsliðið hefur farið hefur einhver svona hópur fylgt þeim."

Króatar fengu nýlega sektir frá evrópska knattspyrnusambandinu fyrir ólæti stuðningsmanna liðsins, bæði heima og úti. Vanalega eru um 100 manns í gæslu á landsleikjum Íslands en verða ríflega 150 á föstudaginn. Að auki mun lögreglan á höfuðborgarsvæðinu aðstoða gæslumenn.

Ekki er víst að allra verstu fótboltabullurnar komist til Reykjavíkur. Til greina kemur að ferðalag þeirra fái snöggan endi segir Víðir.

„Menn hafa auðvitað eftirlit með því og hafa heimild til að vísa hættulegum einstaklingum frá landi ef mat Ríkislögreglustjóra krefst þess."