Lars: Höfum ekki tekið neina ákvörðun varðandi hægri bakvarðarstöðuna

„Við munum leggja mikla áherslu á varnarleik okkar á æfingum og vera viðbúnir sóknarleik Króata,“ sagði Lars Lagerback, þjálfari íslenska landsliðsins, í viðtali við Arnar Björnsson, íþróttafréttamann Stöðvar 2 í gær.

Ísland mætir Króatíu í fyrri leik liðanna í umspili um laust sæti á HM í Brasilíu á föstudagskvöldið en leikurinn fer fram á Laugardalsvelli.

„Maður þarf alltaf að aðlaga sinn leik að styrkleika og veikleika andstæðingsins og þannig munum við undirbúa okkur undir leikina við Króata.“

„Við þurfum einnig að gera ráð fyrir öllum aðstæðum. Ef veðrið verðum slæmt þarf leikur okkar að vera einfaldari og minna verður þá um fallega knattspyrnu.“

Birkir Már Sævarsson, hægri bakvörður íslenska landsliðsins, verður í leikbanni í leiknum á föstudaginn og spurningin sem brennur á allra vörum er hvaða leikmaður tekur hans sæti í liðinu.

„Ég og Heimir [Hallgrímsson, aðstoðarþjálfari landsliðsins,] höfum verið að velta þeirra spurningu fyrir okkur og eigum eftir að sjá 2-3 leikmenn á æfingum áður en við tökum ákvörðun.“

Hægt er að sjá myndband af viðtalinu í spilaranum hér að ofan.