Tólfan auglýsir eftir gas-þokulúðrum

„Við erum á fullu í að reyna að redda þessu,“ segir Jóhann D. Bianco, betur þekktur sem Drummerinn, einn af forsprökkum Tólfunnar stuðningsmannasveitar íslenska landsliðsins í knattspyrnu.

Stuðningsmannasveitin auglýsir nú eftir gas-þokulúðrum fyrir leikinn gegn Króatíu á föstudaginn.

„Við erum búnir að vera með blásturslúðra sem mynda svipaða stemmingu, en við viljum gera þetta þéttara og magna upp stemninguna. Þannig ef einhver lumar á svona má sá hinn sami endilega hafa samband við okkur,“ segir Jóhann.

Sveitin hefur vakið nokkra athygli undanfarið fyrir góðan stuðning á landsleikjum Íslands. Nokkrir meðlimir í Tólfunni fóru til Noregs þegar Ísland tryggði sér sæti í umspilinu.

„Við erum búin að vera á fullu síðan að við komum frá Noregi. Við erum búin að halda formlegan stofnfund, kjósa í stjórn og fleira,“ segir hann.

Í kvöld verður upphitunarkvöld á veitingastaðnum Ölver þar sem verður mikil gleði á sögn Jóhanns.

„Við verðum með happdrætti, þar sem við gefum meðal annars þrjá miða á leikinn, landsliðstreyjur og kaldan bjór,“ segir hann. Nánar um það hér.

Jóhann ætlar ekki að láta sig vanta á landsleikinn á föstudagskvöldið, og hvetur alla til láta vel í sér heyra.

„Allir sem eru í bláu eru í Tólfunni, en við svona harðasti kjarninn erum um 300 manns. Við ætlum að hittast á Ölver í hádeginu á föstudaginn og byrja að keyra um stemninguna," segir hann.