Cristiano Ronaldo tryggði Portúgal sigur

Cristiano Ronaldo, fyrirliði Portúgals, var hetja síns liðs í 1-0 sigri á Svíþjóð í fyrri umspilsleik þjóðanna um laust sæti á HM í Brasilíu. Ronaldo skoraði eina mark leiksins átta mínútum fyrir leikslok.

Cristiano Ronaldo skoraði sigurmarkið með skutluskalla eftir frábæra fyrirgjöf frá Miguel Veloso en skömmu síðar var hann næstum því búinn að koma Portúgal í 2-0 þegar hann skallaði í slá.

Svíar komu til Lissabon til að halda hreinu en voru heppnir að tapa ekki stærra. Það er hinsvegar enn mikil spenna í einvíginu en þjóðirnar mætast aftur í Stokkhólmi á þriðjudagskvöldið.

Cristiano Ronaldo var þarna að skora sitt 44. landsliðsmark en hann stígur varla inn á knattspyrnuvöllinn þessa dagana án þess að skora mark.