Frakkar í vondum málum - töpuðu 2-0 í Úkraínu

Úkraínumenn eru í fínum málum eftir 2-0 sigur á Frakklandi í kvöld í fyrri umspilsleik þjóðanna um laust sæti á HM í Brasilíu. Frakkar eiga því á brattan að sækja í seinni leiknum sem verður í Frakklandi.

Eftir markalausan fyrri hálfleik þá voru Frakkar mun meira með boltann í upphafi seinni hálfleiks en það voru samt heimamenn sem skoruðu.

Roman Zozulya skoraði af stuttu færi á 61. mínútu eftir frábæran undirbúning Andriy Edmar.

Samir Nasri var nálægt því að jafna metin en Úkraínumenn bættu öðru marki við úr vítaspyrnu átta mínútum fyrir leikslok.

Laurent Koscielny, leikmaður Arsenal, felldi þá fyrrnefndan Roman Zozulya og Andriy Yarmolenko skoraði úr vítaspyrnunni.