Tilfinningarnar bera mann oft ofurliði | Gummi Ben í beinni á Bylgjunni í kvöld

„Þetta leggst bara mjög vel í mig og ég er eins og 90% þjóðarinnar að deyja úr spennu,“ segir Guðmundur Benediktsson, íþróttafréttamaður 365, sem mun lýsa leik Íslands og Króatíu í umspili um sæti á heimsmeistaramótinu í Brasilíu beint á Bylgjunni á Laugardalsvellinum í kvöld.

Guðmundur hefur í gegnum árin lýst spennandi leikjum, bæði í ensku úrvalsdeildinni, þeirri spænsku og í Meistaradeild Evrópu en tilfinningarnar bera hann oft ofurliði þegar um íslenska landsliðið ræðir.

„Það er tvennt ólíkt að lýsa leik hjá stórliðum í Evrópu og íslenska landsliðinu. Maður ræður oft á tíðum ekki við tilfinningarnar og það er bara í góðu lagi að mínu mati. Ég má vera eins hlutdrægur og ég vill í kvöld.“

Guðmundur telur að leikurinn í kvöld fari jafnt.

„Ég hef verið að flakka á milli þess að spá leiknum 0-0 eða 1-1. Gylfi Þór Sigurðsson mun setja boltann í netið af 18 metra færi en Mario Mandzukic mun síðan skalla boltann í netið eftir sendingu frá Darijo Srna.“

Mun Mandzukic þá fagna fyrir framan andlitið á Ragnari Sigurðssyni, leikmanni íslenska landsiðsins?

„Ef ég á að vera alveg hreinskilinn þá er ég ekki viss um að Mandzukic viti hver Ragnar er,“ sagði Guðmundur léttur að lokum.

Ragnar Sigurðsson lét þau orð falla í viðtali við Stöð 2 í vikunni að hann vissi í raun ekki hver Mandzukic, leikmaður Bayern Munchen væri.

Guðmundur Benediktsson verður mættur í loftið á Bylgjunni rétt fyrir leik en hér að ofan má heyra hvernig viðbrögðin voru hjá kappanum er Kolbeinn Sigþórsson skoraði mark Íslands gegn Norðmönnum fyrir mánuði síðan. Guðmundur hreinlega trylltist.